Turkiya Geografiya jamiyati
21 sentabr kuni Toshkentda Oʼzbekiston Geografiya jamiyati va Turkiya Geografiya jamiyati oʼrtasida hamkorlik shartnomasi imzolandi. Oʼzaro Аnglashuv Memorandumini Oʼzbekiston Geografiya jamiyati raisi Oybek Norinboyev va Turkiya Geografiya jamiyati prezidenti Ahmet Ertek imzolashdi.
Bitim ishtirokchilari birgalikda ilmiy-tadqiqot va nashriyot faoliyatini amalga oshirish, geografiya sohasida tajriba va axborot almashish, ilmiy aloqalarni rivojlantirishga koʼmaklashish niyatida. Geografiya fanini rivojlantirish doirasida dolzarb yoʼnalishlarda qoʼshma ilmiy-amaliy anjumanlar oʼtkazish rejalashtirilgan.
Oʼzbekiston Geografiya jamiyati raisi Oybek Norinboyev taʼkidlaganidek, Memorandumning imzolanishi geografik tadqiqotlarning ustuvor yoʼnalishlari boʼyicha kelgusida amalga oshiriladigan qoʼshma loyihalar va ikki mamlakat geografiya fanlari rivojiga hissa qoʼshish uchun prinsipial ahamiyatga ega. Jumladan, oʼzbekcha-turkcha va turkcha-oʼzbekcha geografik lugʼat yaratish, toponimik lugʼat yaratish va boshqa tegishli loyihalarni amalga oshirish.
